खोलाले बगाएर एक युवकको मृत्यु

गाईघाट, १२ असोज
खोलाले बगाएर एक युवकको मृत्यु भएको छ
उदयपुरको कटारीमा तावा खोलाले बगाएर एक युवकको मृत्यु भएको छ । विहीबार साँझ देखि बेपत्ता कटारी नगरपालिका–३ राजाबासका १९ वर्षिय मनोज बस्नेतको मृत्यु भएको प्रहरीले जनाएको छ । उनको शब सिन्धुलीको दुधौली नगरपालिकाको वडा न. ६ बटाहाको नदी छेऊमा शुक्रबार विहान फेला पारीएको ईलाका प्रहरी कार्यालय कटारीका प्रमुख प्रहरी नायब उपरीक्षक सुभाष राईले बताए । कटारीबाट साँझ पख घर फर्कदै गरेका उनले तावा खोला नजिकबाट घर आउदै गरेको घरमा जानकारी गराएका थिए । तर उनी लामो समय सम्म घर नफर्किए पछि परीवार र आफन्तले रात भरि उनको खोजी गरिएको थियो । विहानै उनको शब पानीले भिजेको अवस्थामा नदी छेउमा भेटिएको गाउँले देब ढुंङेलले बताए । साँझ पख वर्षा नभए पनि खोलामा धमिलो पानी रहेको उनले बताए । प्रहरीले बस्नेतको मृत्युमा अनुसन्धान शुरु गरेको प्रमुख राईले बताए ।