कान्छो खवर । आइतबार, माघ १६, २०७८
माघ १६ काठमाडौं
नेपाल बार एसोसिएसनले नेपालको संविधान र प्रचलित निर्वाचनसम्बन्धी कानूनका आधारमा तीनै तहका निर्वाचन समयमै गर्न भनेको छ । आइतबार बारले विज्ञप्तिमार्फत् संविधान र कानूनअनुसार निर्वाचन नभए लोकतन्त्र र विधिको शासनको उपहास हुने भन्दै समयमै तीनै तहको निर्वाचन हुनुपर्ने भनेको छ ।
विज्ञप्तिमा भनिएको छ, ‘कुनै आग्रह, पूर्वाग्रह, अनुकूलता, प्रतिकूलतालाई विचार गरेर निर्वाचन गर्ने नगर्ने भन्ने विषय हुन सक्दैन । कुनैपनि बहानामा निर्वाचन नगरी वा पर सारी स्थानीय तहलाई रिक्त बनाउने कुरा संविधान र कानून विपरित मात्र नभई लोकतन्त्र र विधिको शासनको समेत उपहास हुन जान्छ । तसर्थ नेपालको संविधान र प्रचलित निर्वाचनसम्बन्धी कानून समेतका आधारमा सबै तहका निर्वाचन समयमा नै गरि लोकतन्त्रको रक्षा र सम्बर्द्धन गर्ने कार्यमा लाग्न नेपाल सरकार तथा सम्बन्धित सबैसँग हार्दिक अपिल समेत गर्दछौं ।’
बार विधिको शासन, मानव अधिकार, स्वतन्त्र, सक्षम, निष्पक्ष न्यायपालिका, लोकतन्त्र, संवैधानिक सर्वोच्चता, पारदर्शी र जवाफदेही सरकार, बालिग मताधिकार, प्रेश स्वतन्त्रता, शक्ति पृथकीकरण, नियन्त्रण र सन्तुलन तथा कानून व्यवसायीको हक, हितको सम्बर्द्धन र प्रवद्र्धनको पक्षमा रहेको विज्ञप्तिमा भनिएको छ ।
यहाँ कमेन्ट गर्नुहोस्